ໂດຍ: ອຸໄທ ໄຊປັນຍາ
- ນັບແຕ່ພຶດສະພາຈາກ ໄກຫ່າງບໍ່ເຫັນກັນ
ນັບວ່າຫຼາຍຄືນວັນ ຜ່ານໄປໄດ້ມາພໍ້
ດີໃຈບໍ່ຫຼານນ້ອຍ ທັງນັກຮຽນຫ້ອງໃຫຍ່
ສົກຮຽນໃໝ່ໃຈຊື່ນຊ້ອຍ ພວກຫຼານນ້ອຍໄດ້ຊື່ນບານ
- ສົກຮຽນໃໝ່ໃຈຕື່ນເຕັ້ນ ໄດ້ເຫັນໝູ່ທີ່ຈາກລາ
ໜຶ່ງກັນຍາໄດ້ມາເຖິງ ເບິ່ງຜູ້ໃດກໍ່ບານແຍ້ມ
ແນມເບິ່ງໃຜກໍ່ຫົວຍຸ້ມ ຊຸມນັກຮຽນໄດ້ພໍ້ໝູ່
ທັງນາຍຄູກໍ່ດັ່ງດ້ວຍ ຄືດ້າມດອກດັ່ງດຽວ
- ຫຼຽວເບິ່ງໃຜກໍ່ຕື່ນເຕັ້ນ ເພາະເຫັນໝູ່ຄູ່ຫຼາຍຄົນ
ສົນລະວົນກັນໄປມາ ຕາມພາສາຂອງເດັກນ້ອຍ
ສຽງຊອຍວອຍເພິ່ນອ່ອຍເວົ້າ ຈັກເອົາຫຍັງມາຖາມໝູ່
ຢູ່ໄລຍະພັກແລງ ຖະແຫຼງເວົ້າເລົ່າເປັນມາ
- ບາງຄົນວ່າເຮົາໄປຫຼິ້ນ ຢູ່ທ້ອງຖິ່ນທີ່ລືຊາ
ບາງຄົນວ່າເຮົາໄປຮຽນ ຈົນບໍ່ມີວັນພັກຊໍ້າ
ຫຼາຍຄົນຕ່າງຫຼາຍເວົ້າ ແນວວ່າໄປຄົນລະບ່ອນ
ບາງຄົນພັດຢູ່ລ້າ ຄອຍຖ້າແຕ່ມື້ຮຽນ ວ່ານາ
- ສົກຮຽນໃໝ່ໃຈຕໍ່ຕັ້ງ ຕັ້ງຕໍ່ໃສ່ການຮຽນ
ບໍ່ໃຫ້ລຸດເຈັດລົງ ຕາມປະສົງພໍ່-ແມ່ເວົ້າ
ຄະແນນເຈັດຂຶ້ນເມືອໜ້າ ທຸກວິຊາຕ້ອງບາກບັ່ນ
ໃຫ້ຂະຫຍັນຕັ້ງແຕ່ຕົ້ນ ຄວາມຄ້ານບໍ່ໃຫ້ມີ ແທ້ໃດ
- ຢາກໄດ້ຫຍັງພໍ່-ແມ່ຊື້ໃຫ້ ເສື້ອສິ້ນໃໝ່ໂສ້ງງາມໆ
ຕາມໃຈທັງຊາຍ-ຍິງ ທຸກສິ່ງມີໃຫ້ພ້ອມ
ຂໍແຕ່ລູກຮຽນໄດ້ ວິຊາໃດກໍ່ໃຫ້ເກັ່ງ
ເສັງໃຫ້ໄດ້ຂຶ້ນຊັ້ນ ຄະແນນນັ້ນໃຫ້ໄດ້ສິບ ລູກເອີຍ