ນັກຮຽນບ້ານນາ
ໂດຍ: ອຸໄທ ໄຊປັນຍາ
- ເຫັນພາບນີ້ແລ້ວຄິດພໍ້ ອະດີດເກົ່າຄາວຫຼັງ
ຕອນທີ່ຍັງເປັນເດັກ ຢູ່ບ້ານປ່ານານອກ
ສອກຫຼີກໄກທາງເວີ້ງ ຢ່າງໄປຮຽນພ້ອມກັບໝູ່
ບາງຄົນຂີ່ລົດຊ້ອນ ສະອອນແທ້ຜູ້ເພິ່ນມີ ທ່ານເອີຍ
- ສ່ວນວ່າເຮົາຜູ້ນີ້ ພ້ອມກັບໝູ່ອີກຫຼາຍຄົນ
ຢ່າງປະປົນມີຍິງ-ຊາຍ ພ້ອມກັນພາຍຖົງໃສ່ປຶ້ມ
ມີສິ່ງໜຶ່ງບໍ່ລືມໄດ້ ທາງໃນຖົງປີ້ງປາຄໍ່
ມີແຈ່ວໜໍ່ໄມ້ສົ້ມ ຕິບເຂົ້າພ້ອມໄວ້ຕອນສວາຍ
- ບາງມື້ແມ່ເພິ່ນໄດ້ ເອົາເງິນໃຫ້ຍັດໃສ່ຖົງ
ບອກວ່າໄປໂຮງຮຽນ ຕັ້ງໃຈຂຽນແນ່ເດີລູກ
ເພື່ອວ່າທາງພາຍໜ້າ ລູກໃຫຍ່ມາຊິດີກວ່າ
ຄອບຄົວເຮົາໃນຕອນນີ້ ພໍ່-ແມ່ມີໃຫ້ສໍ່າທີ່ເຫັນນີ້ແລ້ວ ລູກເອີຍ
- ໃຜຫາກເຄີຍຜ່ານພົ້ນ ຄົງບໍ່ລືມໄປງ່າຍໆ
ອະດີດຫຼັງແຕ່ກ່ອນກີ້ ຍັງຝັງແໜ້ນຢູ່ໃນຊວງ ຂ້ອຍເດ
ຜ່ານມາຫຼາຍປີແລ້ວ ມີຫຼາຍແນວຍັງບໍ່ປ່ຽນ
ໂຮງຮຽນເຄີຍຮ່ວມຫ້ອງ ມັນຍັງຟ້ອງບໍ່ປ່ຽນແປງ ແທ້ນາ
- ວ່າແລ້ວແນວຢູ່ນອກ ເຂດຫ່າງໄກຄວາມຈະເລີນ
ເຊີນຊວນທ່ານທັງຫຼາຍ ຍິງ-ຊາຍໃຈດີນັ້ນ
ໝັ່ນພາກັນມາຮ່ວມສ້າງ ແປງອາຄານໃຫ້ໜ້າຢູ່
ຄູນັກຮຽນພໍຊິໄດ້ ມີແຮງໃຈຕໍ່ສູ້
ຊ່ວຍຊູກັນບໍ່ຍາກລົ້ນ ທຸກຄົນພ້ອມຊ່ວຍແບ່ງປັນ ແນ່ນາ
