Tuesday, 16 July 2024

ຮັບເອົາມະຫາຊົນຜູ້ກ້າວໜ້າ ເຂົ້າເປັນສະມາຊິກພັກສໍາຮອງ

ໃນຕອນເຊົ້າ ວັນ ພຸດ ທີ 3/7/ 2024 ເວລາ 8ໂມງ30 ນາທີ ກົມພິພິທະພັນ ໄກສອນ ພົມວິຫານ ແລະ ອະນຸສອນສະຖານຜູ້ນໍາປະຕິວັດ ໜ່ວຍພັກກົມ ກພອ ໄດ້ຈັດພິທີຮັບ​ສະມາຊິກພັກສຳຮອງ.​
ໂດຍໃຫ້ເປັນກຽດເປັນປະທານຂອງສະຫາຍ ໄຊຍະລາດ ພົງຍາລັກ ກຳມະການຄະນະພັກ, ເລຂາໜ່ວຍພັກ, ຫົວໜ້າກົມພິພິທະພັນໄກສອນ ພົມວິຫານ ແລະ ອະນຸສອນສະຖານຜູ້ນໍາປະຕິວັດ. ມີບັນດາສະຫາຍເລຂາໜ່ວຍພັກ, ຫົວໜ້າຈຸ, ຕາງໜ້າກົມຈັດຕັ້ງ, ກົມກວດກາ ແລະ ຕາງໜ້າອົງການຈັດຕັ້ງມະຫາຊົນພ້ອມດ້ວຍຜູ້ຕິດຕາມຊ່ວຍເຫຼືອກໍ່ສ້າງ
ໃນພິທີ ສະຫາຍ ນາງ ຂັນກາບ ສັນນິລະວົງ ຮອງຫົວໜ້າກົມຈັດຕັ້ງພະນັກງານ ໄດ້ຜ່ານມະຕິຕົກລົງຂອງຄະນະປະຈໍາພັກ ວ່າດ້ວຍການອະນຸມັດ ຮັບເອົາມະຫາຊົນຜູ້ກ້າວໜ້າ ເຂົ້າເປັນສະມາຊິກພັກສໍາຮອງ ຈໍານວນ 8 ສະຫາຍ ຍິງ 5 ສະຫາຍ
ສະຫາຍ ໄຊຍະລາດ ພົງຍາລັກ ກຳມະການຄະນະພັກ, ເລຂາໜ່ວຍພັກ, ຫົວໜ້າກົມພິພິທະພັນໄກສອນ ພົມວິຫານ ແລະ ອະນຸສອນສະຖານຜູ້ນໍາປະຕິວັດ ໄດ້ມີຄໍາເຫັນໂອ້ລົມ ຍົກໃຫ້ເຫັນເນື້ອໃນວຽກງານຈຸດປະສົງຂອງພັກປະຊາຊົນປະຕິວັດລາວ ແມ່ນການນໍາພາປວງຊົນລາວທັງຊາດດໍາເນີນພາລະກິດປ່ຽນແປງໃໝ່ຮອບດ້ານທີ່ມີຫຼັກການຂອງພັກ, ປົກປັກຮັກສາປະເທດຊາດໄວ້ໃຫ້ໝັ້ນຄົງ ກໍ່ສ້າງລະບອບປະຊາທິປະໄຕປະຊາຊົນໃຫ້ບັນລຸຕາມຈຸດໝາຍສັງຄົມນິຍົມຢຶດໝັ້ນລັດທິມາກ-ເລນິນ ແນວຄິດໄກສອນ ພົມວິຫານ ແລະ ມູນເຊື້ອອັນດີງາມຂອງພັກເປັນພື້ນຖານທາງດ້ານແນວຄິດ, ທິດສະດີຂອງພັກ ເປັນເຂັມທິດໃຫ້ແກ່ການຈັດຕັ້ງ ແລະ ການເຄື່ອນໄຫວວຽກງານຂອງພັກ.​
ໃນນີ້ທ່ານໄດ້ເນັ້ນໜັກໃຫ້ບັນດາສະຫາຍສະມາຊິກພັກໃໝ່ຈົ່ງເອົາໃຈໃສ່ຄົ້ນຄວ້າເຊື່ອມຊຶມຝຶກຝົນຫຼໍ່ຫຼອມຕົນເອງເພື່ອໃຫ້ແຫຼມຄົມໃນທຸກດ້ານກໍາໄດ້ກ່ຽວກັບກົດລະບຽບຂອງພັກໂດຍສະເພາະການກໍ່ສ້າງ ແລະ ປັບປຸງຕົນເອງຕາມ 5 ຫຼັກການ 3 ທິດນໍາ, 5 ໜ້າທີ່, 6 ສິດ ແລະ 9 ຂໍ້ຫ້າມຂອງສະມາຊິກພັກ ທ່ານຍັງໄດ້ເນັ້ນໜັກໃຫ້ສະມາຊິກພັກທຸກສະຫາຍເອົາໃຈໃສ່ເປັນແບບຢ່າງຝຶກຝົນຫຼໍ່ຫຼອມຕົນເອງເປັນແບບຢ່າງໃຫ້ແກ່ມະຫາຊົນຕື່ນຕົວເຂົ້່າຮ່ວມປະກອບສ່ວນໃນຂະບວນການຕ່າງໆໂດຍສະເພາະວຽກງານວິຊາສະເພາະທີ່ຕົນຮັບຜິດຊອບພ້ອມດຽວກັນນັ້ນ ສະຫາຍ ໄຊຍະລາດ ພົງຍາລັກເລຂາໜ່ວຍພັກກໍໄດ້ຂຶ້ນມອບມະຕິຕົກລົງຮັບສະມາຊິກພັກສໍາຮອງໃໝ່ຈໍານວນ 8 ສະຫາຍ, ຍິງ 5 ສະຫາຍ.